Նոր մանրամասներ թրաֆիքինգի համար ազատազրկվածի դատական գործում

Սեռական շահագործման նպատակով կանանց թրաֆիքինգի համար 11,5 տարվա ազատազրկման դատապարտված Բավական Խաչատրյանը նույն մեղադրանքով ներկայումս ամբաստանվող քրոջ դեմ քննիչի մոտ ցուցմունք է տվել՝ իրեն 1 օր անօրինական պահել են ոստիկանության վարչությունում, ծեծել, սպառնացել՝ կորզելով իրենց ցանկալի ցուցմունքը:

Ինչպես տեղեկացնում է ՓաստԻնֆո-ն այդ մասին սեպտեմբերի 7-ին Կենտրոն և Նորք-Մարաշ վարչական շրջանների ընդհանուր իրավասության դատարանում հայտարարեց Բավական Խաչատրյանը, ով ներկայացվել էր դատարան հարցաքննվելու նպատակով, քրոջ՝ Հերիքնազ Խաչատրյանի գործով:

Ըստ Բավականի՝ 2005թ. ինքը քրոջ հետ չի շփվել, որևէ տեղեկություն չի ունեցել, թե քույրը որտեղ է և ինչով է զբաղվում: Նրա մասին մասամբ տեղեկացել է ընտանիքի անդամներից՝ մորից և եղբորից:

Բավական Խաչատրյանը դատարանում հայտնեց, որ Դուբայում ընկերուհի ունի, որի անունը Անո է և ով իրեն ավելի շատ է քույր, քան իր սեփական քույրը:

Ընկերուհի ասված «քուրոն» էլ Դուբայում զբաղվել է «խառը գործերով», այդ թվում նաև՝ մարմնավաճառների հետ է կապ ունեցել:

Դատապարտյալը դատարանում հայտնեց, որ 2008թ. իրեն է դիմել քրոջ գործով անցնող տուժողներից մեկը և հայտնել, որ ցանկանում է Թուրքիա գնալ աշխատելու, որպեսզի Հայաստանում կուտակած պարտքերը փակի: Բավականը խոստացել է օգնել, ասելով, որ «քուրոյին» կզանգի այդ հարցով:

«Քուրո» ասելով, ըստ դատապարտյալի, ինքն ի նկատի է ունեցել Անոյին և ոչ թե իր քրոջը՝ Հերիքնազին, ինչպես որ տուժողներն են ներկայացնում:

Բավականի բնութագրմամբ՝ գործով տուժող ճանաչված այդ աղջիկը «պրոֆեսիոնալ մարմնավաճառ է» և իրեն հայտնել է, որ ինքը միայն այդ գործով կարող է զբաղվել, նշելով, որ գործի մեջ որևէ սահմանափակում և կաշկանդվածություն չկա:

Բավականը օգնել է տուժողին գնալ Դուբայ՝ Անոյի մոտ և քանի որ նա Հայաստանում պարտքեր է ունեցել Բավականից պարտքով գումար է խնդրել, պարտքերը փակել՝ խոստանալով վերադարձնել:

Սակայն երբ տուժողը Դուբայ է հասել, Բավականի ընկերուհին իրեն զանգահարել է և ասել, որ մարմնավաճառության նպատակով իրենց մոտ ուղարկված աղջիկը պայմաններ է դրել՝ մարմնավաճառությամբ զբաղվելուց առաջ ոգելից խմիչք պետք է օգտագործի:

Պարզվել է նաև, որ ոգելից խմիչք օգտագործելուց հետո էլ նա երակները կտրում է: Եվ քանի որ տեսքն էլ չի համապատասխանել պահանջվածին՝ տալով նրան 500-600 ԱՄՆ դոլար և մեկ բջջային հեռախոս, հետ են ուղարկել Հայաստան:

Ինչ վերաբերում է գործով մյուս տուժողին, ապա, ըստ դատապարտյալի, նա ևս մարմնավաճառ է եղել, վերջինս մոր հետ երկար տարիներ բնակվել են Բավականենց տանը, սակայն նա Դուբայ չի հասել, քանի որ Բավականին զանգել ու տեղեկացրել է, որ վիզան կորցրել է, և նա վերադարձել է Հայաստան:

Հիշեցնենք, որ այս տուժողը դատարանում հայտնել է, որ ինքնաթիռում տեղեկացել է, թե ինչ գործով է Դուբայում զբաղվելու, պատռել է վիզան, որպեսզի իրեն հետ ուղարկեն Հայաստան:

Տուժողներից երկուսն էլ, ովքեր իր դեմ ցուցմունք են տվել, ըստ Բավականի, «6-րդ վարչության մարդիկ են»՝ խոսքը Ոստիկանության Կազմակերպված հանցավորության դեմ պայքարի վարչության մասին է:

Բավականի խոսքով՝ գործով մյուս երկու տուժողներն էլ՝ իրենից տեղեկանալով, թե Դուբայում ինչ գործով են զբաղվելու, հրաժարվել են գնալ:

Դատարանում քույրերի փոխհարաբերությունները առերևույթ վատ էին, անգամ Բավականը քրոջ ռեպլիկին պատասխանեց, որ «դու ո՞վ էիր, որ ես քո անունը տայի, էսօր ես եմ դատված»:

Տուժողների ներկայացուցիչ Հովիկ Արսենյանի հարցերին դատապարտյալը հրաժարվեց պատասխանել, ապա նաև նրան անվանեց «քննիչի մարդ»:

Բավականը հերքեց գործով բոլոր տուժողների այն պնդումը, թե Բավականը զանգել է քրոջը՝ Հերիքնազին և թե տուժողներն անգամ Հերիքնազի հետ հեռախոսազրույց են ունեցել: Ըստ Բավականի, ինքը քրոջ հետ ընդհանրապես կապ չի ունեցել, նրա հեռախոսահամարն անգամ չի ունեցել, իսկ իր մորը զանգահարել է փակ համարից:

Չնայած, ըստ Բավականի, ինքը քրոջ հետ չի շփվել տարիներ շարունակ, սակայն լավ հիշում էր, թե քրոջը երբ են վտարել Դուբայից՝ նրա անձնագրի մեջ էր կարդացել:

Դատապարտյալի հարցաքննությունից պարզ դարձավ, որ ինքը բոլորին ցանկացել է օգնել, բայց այդ գործարքներից շահույթ չի ստացել:

Բավական Խաչատրյանի հարցաքննությունը կշարունակվի սեպտեմբերի 19-ին կայանալիք նիստում:

Share