Երեխաների թրաֆիքինգ

Ինչպես երեխայի հետ խոսել թրաֆիքինգի մասին

Ծնողները, խնամակալները, դայակները, դասավանդողները վաղ տարիքից պետք է խոսեն երեխայի հետ Թրաֆիքինգի մասին:

Պետք է գիտակցել, որ մեզանից յուրաքանչյուրն այս խնդրի լուծման և կանխարգելման մեջ ուրույն տեղ է զբաղեցնում: Իրազեկման ճանապարհով ապահով միջավայրի ստեղծումը կօգնի նվազեցնել վախն ու անհանգստությունը, շրջանցել վտանգները և հնարավորություն կտա երեխային ապահով ապրել հասարակության մեջ:

Անշուշտ, յուրաքանչյուր ծնող գիտի, թե ինչպես դաստիարակել իր երեխային, սակայն այս առանցքային հաղորդագրությունները օգտակար կլինեն նրանց՝ մարդկանց թրաֆիքինգի խնդրի մասին հստակ տեղեկատվություն հասցնելու հարցերում:

Ծանոթություն

Թրաֆիքինգը մարդկանց ստրկական, սեռական, բռնի և չնչին վարձատրությամբ աշխատանքի տեսքով անօրինական շահագործումն է։ Այն ծանր հանցագործություն է, որը ոտնահարում է մարդկանց իրավունքները: Ամբողջ աշխարհում մոտավորապես 2.5 միլիոն մարդ՝ 127 երկրներից ենթարկվում են թրաֆիքինգի, որոնց 1/3-ը երեխաներ են։

Թրաֆիքյորներն այն մարդիկ են, ովքեր զբաղվում են մարկանց վաճառքով և վերջինիս շահագործմամբ: Կան նաև միջնորդներ, ովքեր օգնում են առևանգել զոհին, այնուհետև փոխանցել թրաֆիքյորին՝ հետագա շահագործման համար: Խարդախությամբ, խաբեությամբ նրանք գրավում են զոհերին, ովքեր շատ ավելի ուշ են տեղեկանում իրենց իրական կարգավիճակի մասին։ Հարկ է նշել, որ թրաֆիքյորներն ու միջնորդները հաճախ ծանոթ են լինում զոհին, որն էլ նրանց վստահում է:

Թրաֆիքինգի կարող է ենթարկվել ցանկացած մարդ` մեծահասակ, երեխա, կին, տղամարդ, նշանակություն չունի ո՛չ տարիքը, ո՛չ ազգությունը և ո՛չ հավատքը: Թրաֆիքյորները հավաքագրում են զոհերին՝ ուժի, խարդախության, հարկադրանքի միջոցով և ենթարկում շահագործման: Բացահայտվել են շահագործման այլ ձևեր ինչպիսիք են՝ հարկադիր ամուսնությունը, օրգանների հեռացումը և վաճառքը, երեխաների ապօրինի որդեգրումը և շահագործումը մուրացկանության ճանապարհով:

Ի՞նչ նշաններ կարող են հուշել, որ անհատը թրաֆիքինգի զոհ է դարձել

Հարկ է նշել, որ այս ցանկը ամբողջական չէ և ներկայացնում է հնարավոր մի քանի հուշանշաններ:

Աշխատում է հարկադրանքի միջոցով, այսինքն՝ հակառակ իր կամքին:
Անչափահասի աշխատանք, որը նրան հասցնում է ֆիզիկական, հոգեբանական, սոցիալական և բարոյական մեծ վնասներ, զրկում է կրթությունից, զարգացումից և ընտանիք ունենալուց:

Աշխատում է չափազանց երկար և անսովոր աշխատանքային գրաֆիկով:
Առկա են անսովոր աշխատանքային սահմանափակումներ՝ ընդմիջումների բացակայություն, տեղաշարժվելու իրավունքի բացակայություն…
Ֆիզիկական/սեռական բռնության, բանտարկության, խոշտանգումների նշաններ են նկատվում:
Ինքնուրույն չի հաղորդակցվում մարդկանց հետ. միշտ առկա է երրորդ անձը, որը վերահսկում է նրան և նրա խոսքը:
Իր գտնվելու վայրի/տեղանքի/քաղաքի/երկրի մասին բավարար տեղեկատվության պակասը, այն բացատրելու անկարողունակությունը:
Խոսքի մեջ նկատելի են բազմաթիվ անհամապատասխանություններ:

Խորհուրդներ երեխաներին

Հարկավոր է ծնողների կամ դասավանդողների օգնությամբ և վերահսկողությամբ «զինվել» բավարար տեղեկատվությամբ:
Սոցիալական կայքերում մի՛ ընդունեք անծանոթներից ստացված ընկերության հրավերները:
Իրազեկ եղե՛ք, թե ինչպես են թրաֆիքյորները հավաքագրում մարդկանց և ուշադրություն դարձրե՛ք ձեր շրջապատին:
Անձնական տվյալներ (անուն, ազգանուն, դպրոց կամ հասցե)մի՛ տվեք անծանոթներին կամ սոցիալական կայքերի ընկերներին՝ անկախ նրանց սիրալիրության աստիճանից:
Մի՛ համաձայնեք հանդիպել անծանոթների հետ, առանց որևէ չափահաս և վստահելի մարդու ներկայության (ծնող, ուսուցիչ, բարեկամ):
Եթե անհանգստացնող հարցեր ունեք, ապա անպայման խորհրդակցեք ծնողերի հետ, ովքեր կօգնեն Ձեզ գտնել ճիշտ ելքը:
Անձնական տեղեկություն պարունակող տվյալներ կամ փաստաթղթեր (անձնագիր, նույնականացման քարտ, կացության թղթեր)երբեք մի՛ թողեք հասարակական վայրերում կամ մի՛ տվեք այլոց:
Եթե վտանգի մեջ եք, հոգեբանական և ֆիզիկական վնաս են հասցնում Ձեզ, ապա անմիջապես դիմեք օգնության՝ զանգահարելով հետևյալ հեռախոսահամարներով՝
0 800 50 558;
0 800 80 801;
0 800 50 550: