Ամփոփվեց մարդկանց թրաֆիքինգի և դրա դեմ պայքարի լուսաբանման ամենամյա մրցանակաբաշխության արդյունքները

ByAAVR

Ամփոփվեց մարդկանց թրաֆիքինգի և դրա դեմ պայքարի լուսաբանման ամենամյա մրցանակաբաշխության արդյունքները

2018թ.-ի դեկտեմբերի 26-ին ՀՀ արտաքին գործերի նախարարությունում տեղի ունեցավ Մարդկանց թրաֆիքինգի և դրա դեմ պայքարի լուսաբանման ամենամյա մրցանակաբաշխությունը, որն անցկացվում է արդեն յոթ տարի անընդմեջ: Մրցանակաբաշխության նախաձեռնող կողմը ՀՀ-ում մարդկանց թրաֆիքինգի և շահագործման դեմ պայքարի հարցերով խորհուրդն է: Մրցույթի նպատակն է խրախուսել այն լրագրողներին, որոնք իրենց աշխատանքներում անդրադառնում են մարդկանց թրաֆիքինգի երևույթին, հանրությանը տեղեկացնում դրա բացասական ազդեցությունների մասին, մատնացույց անում ելքերը՝ նպաստելով թրաֆիքինգ երևույթի և դրա դեմ պայքարի աշխատանքների մասին հանրային իրազեկման բարձրացմանը: 2018թ.-ի նոյեմբերի 26-ին հայտարարված մրցույթում ընդգրկվել են 2017-2018թթ.-ին հրապարակված մարդկանց թրաֆիքինգի և շահագործման դեմ պայքարին վերաբերող տպագիր, առցանց, ռադիո և հեռուստատեսային լրագրողական նյութերը: Մրցույթին ներկայացվել է 9 լրագրողական նյութ: Ներկայացված աշխատանքները, նախապես մշակված չափորիշիչներով, գնահատել է ընդհանուր 6 լրագրողներից և փորձագետներից կազմված ժյուրիի կազմը` առաջնորդվելով լրագրողական էթիկայի և թրաֆիքինգ երևույթի ճիշտ մեկնաբանման սկզբունքներով: Մրցանակների հանձնման արարողությանը բացման խոսքով հանդես եկավ ՀՀ-ում մարդկանց թրաֆիքինգի և շահագործման դեմ պայքարի հարցերով Խորհրդի աշխատանքային խմբի ղեկավար Վահրամ Կաժոյանը, ով հանգամանալից ներկայացրեց թրաֆիքինգի ոլորտում ՀՀ-ում իրականացված կանխարգելիչ աշխատանքները, գրանցված դրական արդյունքները, սույն մրցույթի նպատակները և զարգացումները: Բանախոսը իր խոսքում հատուկ անդրադարձավ www.antitrafficking.am կայքի առկայության կարևորության թեմային, որակելով լավագույն շտեմարան, որտեղ կարելի է գտնել նպատակային համապարփակ տեղեկատվություն։ Հաջորդիվ մրցույթի կազմակերպիչ, Ինֆորմացիայի ազատության կենտրոնի Ծրագրերի համակարգող Լիանա Դոյդոյանը հայտարարեց մրցույթի արդյունքները: Ըստ Ժյուրիի անդամների գնահատականների՝ մրցանակային տեղեր են զբաղեցրել հետևյալ նյութերը.

1. Հեռուստատեսություն և ռադիո անվանակարգ

• Առաջին տեղի մրցանակակիր չկա
• Երկրորդ տեղի մրցանակակիրները երկուսն են՝ Քրիստինե Ոսկանյան, ԱՐ հեռուստաընկերություն՝ «13 մարդ ստրկության է ենթարկվել» և  Ամալյա Պապյան, ռադիո Մարշալի եթերով հեռարձակված՝ «Բաց Փակագիծ». Թրաֆիքինգի նոր դրսևորումներ՝ արդեն Հայաստանում 
• Երրորդ տեղի մրցանակակիր չկա

2. Տպագիր և առցանց լրատվամիջոցներ անվանակարգ

• Առաջին տեղի մրցանակակիրն է Արմինե Ավետիսյանը, OC Media «Սեքս ստրկության զոհերը. թրաֆիքինգ»
• Երկրորդ տեղի մրցանակակիր չկա  
• Երրորրդ տեղի մրցանակակիրները երկուսն են՝ Լիլիթ Դեմուրյան, Արմենպրես լրատվական գործակալությունից, «Թրաֆիքինգի զոհ է դարձել ՀՀ 37 քաղաքացի. ինչպիսի շահագործման են ենթարկվում հայերը և որտեղ. հարցազրույց»  և Ելենա Արամյանը Լեգալինֆո, «Թրաֆիքինգի դրսևորումները ՀՀ-ում. աշխատանքային շահագործում»  

Մրցանակակիրներին հանձնվեցին հավաստագրեր, ինչպես նաև մրցանակային տեղերի համար սահմանված դրամական պարգևներ՝ 200, 170 և 130 հազարական ՀՀ դրամ՝ համապատասխանաբար առաջին, երկրորդ և երրորդ տեղերի համար: Տպագիր և առցանց լրատվամիջոցներ անվանակարգի առաջին տեղի մրցանակակրին հանձնվեց նաև խորհրդանշական արձանիկը։

Մրցանակաբաշխության ֆոտոշարքը այս հղումով՝  Թրաֆիքինգի և դրա դեմ պայքարի լուսաբանման ամենամյա լրագրողական մրցանակաբաշխություն 2018

Մեդիա անդրադարձներ՝

https://www.aravot.am/2018/12/26/1005240/