ByAAVR
Մարդկանց թրաֆիքինգի դեմ պայքարի նոր ազգային ծրագրի մշակում աշխատանքային խմբի կողմից
2018թ.-ի հուլիսի 27-ից 29-ը կայացավ ՀՀ-ում մարդկանց թրաֆիքինգի և շահագործման դեմ պայքարի աշխատանքային խմբի հերթական հանդիպումը։ Այս հանդիպումն ավարտին հասցրեց ՀՀ-ում թրաֆիքինգի և շահագործման դեմ պայքարի 2019-2021թթ. ազգային ծրագրի մշակումը, որն ուժի մեջ կմտնի ՀՀ կառավարությանն առընթեր Մարդկանց թրաֆիքնգի դեմ պայքարի Խորհրդի հաստատումից հետո և ՀՀ-ն առաջիկա 3 տարիների համար կունենա մարդկանց թրաֆիքինգի կանխարգելման և տուժածների աջակցության ևս մեկ իրատեսական ծրագիր։
Քանի որ 2017թ.-ին Հայաստանը ԱՄՆ պետքարտուղարության հայտնի զեկույցի արդյունքներով 5 ամյա առաջատարի դիրքը զիջեց, ուստի այս ազգային ծրագրում պահպանելով ձեռքբերումները՝ ուժեղացվեցին նաև այն գործողությունները, որոնց թերացման պատճառով Հայաստանը հայտնվել է 2-րդ խումբ երկրների շարքում։
Աշխատանքային խմբի անդամ պետական, միջազգային և հասարակական կառույցների ներկայացուցիչների օրինակելի աշխատանքի շնորհիվ լուրջ քննարկումներ ծավալվեցին հատկապես ՀՀ ոստիկանության և ՀՀ աշխատանքի տեսչության աշխատանքների կազմակերպման ուղղությամբ։ Հանդիպման մասնակից ՀՀ-ում ԱՄՆ դեսպանության ներկայացուցիչներն իրենց աջակցության պատրաստակամությունը հայտնեցին ազգային նոր ծրագրի լիարժեք իրականացման հարցում։
Աշխատանքային խմբին ղեկավար Վահրամ Կաժոյանը և քարտուղար՝ Լուսինե Հակոբյանը լիարժեք համակարգելով աշխատանքային խմբի բոլոր անդամների առաջիկա գործողությունների պլանները, կարողացան ստանալ այն ցանկալի ազգային ծրագիրը, որով այսօր կարող է հպարտանալ մեր երկիրը։
Զարմանալի կազմակերպված և սրտացավ են աշխատանքային խմբի բոլոր անդամները, որոնք հասարակական հիմունքներով ամեն ինչ անում են, որ Հայաստանում մարդկանց թրաֆիքինգի երևույթը հասցվի նվազագույնի։
Աշխատանքային խմբում ընդգրկված են ՀՀ նախարարությունների, մարդու իրավունքների պաշտպանի, միջազգային և քաղաքացիական հասարակության կազմակերպությունների ներկայացուցիչներ։
Հանդիպման կազմակերպումն հնարավոր դարձավ ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության բյուրոյի աջակցության շնորհիվ։
AAVR administrator
About the author